अगर मोर मानसिक स्वास्थ्य परभावित होथे त मोला मनोसामाजिक अउ भाउनातमक सहायता लेबर काबर जरुरी हे?

From Audiopedia - Accessible Learning for All
Jump to: navigation, search

अगर तुमन, मानसिक रुप ले तकलीफ ले परभावित हव त तूमन ल डरे के जरुवत नइ हे। ए सिरतोन नोहे के तुमन पगला गे हो। अउ तुमन अकेल्ला अइसन नइ हव। दुनिया म लाखों लोगन अइसन हे जेन मन अइसन स्थिती ले गुजरत हे अउ तुंहर बर सहायता पाए के कइठन रद्दा हे। फेर एखर बर तुमन ल मनोसामाजिक सहायता मांगे के जरुवत हे। तुमन ल सहायता पाना अब्बड़ जरुरी हे, काबर के अइसन स्थिती के अकेल्ला सामना करे मा अब्बड़ मुसकुल होथे। अगर तुंहर मानसिक स्वास्थ्य ठीक नइ रही त एखर सेती तुमन ल समाजिक जीवन म भाग ले म, इस्कूल म या फेर काम-बूता करे म परसानी हो सकत हे। कभु-कुभ, अइसन स्थिती आत्मघाती बेवहार डहार ले जाथे।

साथे-साथ खराब मानसिक हालत के कारन खुद के जतन करइ घलो मुसकुल हो जाथे। बुरुली घाव के संक्रमन के बाद रोज-रोज अपन जतन करई अब्बड़ जरुरी होथे, काबर के एहा तुंहर सरीर ला अउ जादा नकसान ले बचाथे। अगर तुमन अपन सरीर के जतन नइ कर सकहू, त तुमन ल बिकलांगता के खतरा हो सकत हे। कइ जातसमाज म बिकलांगता के बारे म कइठन गलत धारना फइले रहिथे। एखरे सेती बिकलांगता ले तुमन खुद ले अलग-बिलग महसूस कर सकत हव। तुंहर बहिसकार हो सकत हे। ए ह तुमन ला अलग-बिलग महसूस करा सकत हे, जेखर ले तुमन सरम अउ उदासी के अनुभव करहु अउ फेर एखर ले आपके मानसिक हालत अउ जादा बिगड़ सकथे। अइसन सबो स्थिती ले बचे बर, तुमन ल सहायता लेना अब्बड़ जरुरी हे! बने-बने सहायता ले कइझन मरीज अपन खराब मानसिक हालत ले उबर जाथे। तुमन अपन मनोसामाजिक ताकत ल दुबारा हासिल कर सकत हव अउ एहा तुमन ल अपन बीमारी ले लड़े बर अउ जादा ताकत दिही। तुमन ल कउन किसम के मनोसामाजिक सहायता के जरुवत हे, एला समझे बर तुमन ल मनोवैग्यानिक डाक्टर संग मिले ल लगही। अगर तुमन ल मनोवैग्यानिक डाक्टर के बारे म जियादा पता नइ हे त स्वास्थ्य कारकरता ले गोठबात करके सहयोग पाये के खातिर सबो विकल्प के बारे म जानना चाही। अइसन हालत म कइठन विकल्प हो सकत हे, जइसे कोनो स्वयं-सहायता समूह म सामिल होना। जिहां तुमन अपन अधिकार के बारे म जानकारी ले सकत हव, अउ ओखर उपयोग के तरीका सीख सकत हव। तुमन अपन बारे म फइसला ले बर सीख सकत हव अउ अपन हिसाब ले अपन जिनगी ल समहाल सकत हव। साथे-साथ तुमन अपन पइसा कौड़ी के मामला ल समहाले के बारे म भी सहायता ले सकत हव।

फेर इंहा व्यक्तिगत सहायता असन दूसर विकल्प भी हो सकत हे।

Sources
  • Audiopedia ID: hne_53_20