अगर मोर म कोनो दुरबलता हे त मैं का कर सकत हवं?

From Audiopedia - Accessible Learning for All
Jump to: navigation, search

सबले पहिली, \"मोर म दुरबलता हे अउ लोगन कहिथें के मैं योग्य मनखे नइ हवं- का ए बात सही हे?\" पाठ ल बने असन सुनव। पहिली एला समझना अब्बड़ जरुरी हे।


एखल अलावा, ये समझना घलो अब्बड़ जरुरी हे के हर दुरबलता अलग-अलग तरीका ले पइदा होथे। तुमन पहिली ले एखर बारे म कुछु नइ कहि सकव। कोनो भी कारन ले एला तुमन ल लुकाना-छिपाना नइ चाही, बल्कि सुरुवाती लकछन के पता लगाना चाही अउ तुरते इलाज अउ नियमित जतन सुरु करे ल चाही। तुमन ल नियमित रुप ले कोनो स्वास्थ्य कार्यकर्ता ले मिलना चाही, जेखर ले कोनो बदलाव ल तुरते पकड़े जा सके अउ इलाज सुरु करे जा सके।


अगर तुमन ह अपन दुरबलता के संग बने असन जिये के तरीका ढूंढ सकत हव अउ तुमन ल अपन दुरबलता ल अपन ताकत बनाए बर पुरूतसाहित करे जाथे, त तुंहर दुरबलता म सुधार हो सकत हे। साथे-साथ तुरते इलाजपानी अउ बने-बने जतन ले घलो तुमन कईठन परसानी ल रोक सकत हव। सुरता रखु के दुरबलता के परकार के मुताबिक, इलाज अउ जतन के तरीका घलोक अलग-अलग हो सकत हे। ए बारे म \"दुरबलता के इलाज कइसे लगथे?\" के अध्याय म बिस्तार ले बताए गे हे।


अपन सरीर के बने असन जतन करइ, नियमिल रुप ले खुद के जतन करइ, अउ आगु बर दुरबलता ल बढ़े बर रोके के खातिर स्वच्छता के धियान रखइ अब्बड़ जरुरी होथे। एखर बारे म आगु के अध्याय म बिस्तार ले बताए गे हे। कईझन मरीज मन बर, स्व-सहायता समूह म सामिल होना बने विकल्प होथे। इहां अपन सरीर के जतन के बारे म तुमन परसिकछन ले सकत हव।


इहां तुमन एक-दूसर ल पुरूतसाहित कर सकत हव। अउ नियमित अउ परभावी जतन के बारे म एक-दूसर ल सलाह दे सकत हव। साथे-साथ तुमन ल मानसिक अउ आर्थिक मामला म सहयोग मिल सकत हे अउ तुमन अपन अधिकार के बारे म घलोक जान सकत हव।


साथे-साथ अपन परिवार के सदस ल बतावव के ओमन तुंहर कइसे सहायता कर सकत हें!

कईठन मामला म, दुरबलता के कारन दिमागी परसानी घलो पइदा हो सकत हे। अगर तुंहर संग तको अइसन होत हे त कोनो स्वयं सहायता समूह म तुमन सामिल हो सकत हव। वइसे, सहायता पाए के कईठन तरीका हे। एखर बारे म जादा जाने बर कोनो स्वास्थ्य कार्यकर्ता संग मिलना चाही। तुंहर उदेस ये होना चाही कि तुमन ल घलो दूसर मनखे असन जिनगी के सबो हिस्सा म समान पहुंच मिले।


Sources
  • Audiopedia ID: hne_55_13