असुरछित गर्भपात ले होवइया मउत ल कइसे रोके जाए?
कईझन माईलोगन मन, हतास हो के अपन गर्भावस्था ल खतम करे के तरीका खोजथें। अइसन नीचे बताए गे तरीका ले दूरिहा रहना चाही, काबर के ए अब्बड़ खतरनाक होथे:
योनि अउ गरभासय म छड़ी, तार या प्लास्टिक के नली जइसन नोकिल्ला जिनिस नइ डालना चाही। ए हर गरभासय ल फाड़ सकत हे अउ खतरनाक रूप ले खून बह सकत हे। एखर ले संकरमन घलोक हो सकत हे।
योनि या गरभासय म कोनो परकार के जड़ी-बूटी झन डालव। ए हर जलन या परसान कर सकत हे, जेखर सेती भारी नकसान, संकरमन अउ रक्तस्राव हो सकत हे।
योनि या गरभासय म ब्लीच, राख, साबुन या माटी के तेल जइसन जिनिस झन डारव। संगेसंग ओमन ल पीयव घलोक झन।
गर्भपात कराए के पहिली अब्बड़ अकन दवई या कोनो पारंपरिक इलाज झन करव (चाहे मुंहु ले या योनि ले)। जइसे, मलेरिया (क्लोरोक्वीन) या लईका के जनम के बाद खून बहे ल रोके बर (एर्गोमेट्रिन, ऑक्सीटोसिन) दवई के अब्बड़ अकन सेवन ले गर्भपात के पहिली मउत हो सकत हे।
अपन पेट ल झन मारव या खुद ल सीढ़िया ले नीचे गिराए के कोसिस झन करव। एखर ले तुमन ल भारी चोट लग सकत हे। एखर ले गर्भपात नइ होवए।
जरूरी बात: कभु अपन गर्भ के भीतर कुछु जिनिस ल झन डालव। कोनो अपरसिछित मनखे ल तको अइसन झन करन दव। एखर ले तुंहर जान जा सकत हे।
असुरछित गर्भपात ले बचव। अनचाहे गर्भधारन होए के पहिली, ओला रोके के परयास करव।