एक महिला होए के नाते मोर बर नसीला जिनिस अउ दारू हा अउ जादा काबर खतरनाक हे?
वइसे त नसीला जिनिस अउ दारू पीये ले कोनो भी मनखे ल नकसान होथे, लेकिन माईलोगन मन ल एखर अउ जादा नकसान हो सकत हे।
जेन माईलोगन मन जादा दारू पीथें या जादा नसीला जिनिस के सेवन करथें, ओमन ल आदमीजात के तुलना म लिवर के बीमारी होए के जादा खतरा होथे।
कई माईलोगन या फेर टुरी टानकी मन, जब दारू या फेर दूसर किसम के नसीला जिनिस के सेवन करथें, त ओमन ल जबरन सारीरिक संबंध बनाए बर मजबूर करे जथे। एखर कारन ओमन ल अनचाहे गर्भ, एचआईवी संकरमन या फेर एसटीआई के बीमारी हो सकत हे।
जब कोनो गर्भवती महिला हा दारू, बीड़ी-सिगरेट पीथे या फेर नसीला जिनिस के उपयोग करथे त लइका उपर एखर खराब असर पड़थे। ए दउरान नसा करे ले लइका म जनमजात बीमारी या फेर मानसिक बिकलांगता तको हो सकत हे। लइका ल अइसन किसम के समसिया हो सकत हे-
नसा के लत के कारन माईलोगन ल जादा सरम आथे:
कईठन जातसमाज म, आदमीजात के तुलना म माईलोगन के उपर जादा नियंतरन रखे जथे। अगर आदमीजात नसा करथे त ओला सामान्य बात माने जथे, लेकिन माईलोगन के नसा ल अब्बड़ बुरा माने जथे। अगर कोनो महिला जादा दारू या फेर नसीला जिनिस पीये के कारन अपन बेवहार म नियंतरन गंवा डालथे, त ओला “चरितरहीन” समझे जथे, भले अइसन हालत म ओहा काखरो संग सारीरिक संबंध झन बनावत रहय। फेर लाज-सरम ले बचे बर अइसन माईलोगन हा एके पइत म जादा करे के बजाए, धिर लगाके लगातार नसा करे बर धर लेथें। एखर ले ओमन अपन बेवहार म नियंतरन रख पाथें। एखर अलावा माईलोगन मन अपन नसा के लत ल लुकाथें घलो अउ एखर जरिया अपन बीमारी के इलाजपानी तको नइ कराए।
ए किसम के सबो बेवहार, दारू या दूसर नसीला जिनिस ले होवइया नकसान के संभावना ल अउ बढ़ाथे।
लड़ई-झगरा के हालत म, दारू अउ नसीला जिनिस हालत ल अउ जादा खराब कर देथे। खासकर, घर म।
अगर महिला के संगे-संग ओखर कोनो साथी घलो नसा करथें, त लड़ई-झगरा के हालत म चोट लगे के या फेर मउत होए के खतरा अउ बढ़ जथे।