का मैं संतोसजनक यौन संबंध बना सकत हवं?
From Audiopedia - Accessible Learning for All
अगर तुमन दिव्यांगता के संग पइदा होए रहेव, या छोटपन म तुमन दिव्यांग होए रहेव, त तुमन ल ए भरोसा करे म थोरकन तकलीफ हो सकत हे, के तुमन यौन रुप ले आकरसक हव। अइसन म दिव्यांगता वाले दूसर माईलोगन ले गोठबात करना चाही, उंखर ले पूछना चाही के ओमन हा अपन ए डर ले कइसे बाहिर निकलीन। एखर ले तुमन ल अपन बारे म अलग महसूस करे बर सीखे म मदद मिलही। लेकिन ए दउरान तुमन ल धीरज धरे बर लगही। काबर के लंबा बखत के धारना ल बदले म अब्बड़ बेरा लगथे।
अगर आपमन ल दिव्यांग होए जादा बखत नइ होए हे त अइसन म तुमन ल लग सकत हे के अब तुमन यौन रुप ले आकरसक नइ रहिगे हव अउ तुमन एक बात ले दुखी रहि सकत हव के अब सारीरिक संबंध बनाए म परसानी हो सकत हे।
कामुकता के बारे म सही जानकारी पढ़-लिख के दिव्यांगता वाले माईलोगन के मदद करे जा सकते। अइसन समसिया के दउरान कोनो भरोसेमंद सिकछक, स्वास्थ्य कार्यकर्ता अउ दिव्यांगता वाले दूसर माईलोगन संग कामुकता के बारे म गोठबात करे के परयास करना चाही।
एक-दूसर ल खुस करे बर, तुमन ल अउ तुंहर पति ल परयोग करे के जरूवत पड़ सकत हे। उदाहरन बर, अगर दिव्यांगता के कारन अगर तुंहर हाथ या फेर जननांग म कुछु जनावत नइ हावे, त सारीरिक संबंध बनाए के दउरान यौन भाउना पइदा करे बर दूसर अंग के परयोग कर सकत हव, जइसे कान, स्तन या फेर गला। तुमन अलग-अलग पोजीसन अजमा सकत हव, जइसे करवट ले के या कुरसी मा। अगर तुमन अउ तुंहर पति इमानदारी ले एक-दूसर के भाउना के कदर करहू त संतोसजनक यौन संबंध बनाए जा सकत हे।