का सबो लईकामन के टीकाकरन होना चाही?
लईकामन के जर, खांसी, सरदी, दस्त अउ दूसर कोनो बीमारी के कारन, कईझन दाई-ददा मन अपन लईकामन के टीकाकरन नइ करवाएं। वइसे, छोट-मोट बीमारी म टीका लगवाए जा सकत हे।
दिव्यांग अउ कुपोसित लईकामन के टीकाकरन तको सुरछित होथे। अगर कोनो लईका हर एचआईवी ले पीड़ित हे या फेर एखर संदेह हे, त कोनो परसिछित स्वास्थ्य कार्यकर्ता के सलाह ले के टीका लगवाना चाही।
इंजेक्सन के बाद, अगर लईका हर रोथे या ओला जर आ जाथे, या छोटे दाना या हल्का घाव होथे, त ए हर समान्य बात रहिथे, अउ एखऱ ले पता चलथे के टीका हर काम करत हे। छै महीना ले कमती उमर के लईका ल बार-बार स्तनपान कराना चाही अउ बड़का लईकामन ल अब्बड़ अकन तरल पदार्थ अउ जेवन देना चाही। अगर लईका ल टीका ले तेज जर आथे (38 डिग्री सेल्सियस ले जादा), त तुरते कोनो परसिछित स्वास्थ्य कार्यकर्ता करा या फेर स्वास्थ्य केंद्र लेके जाना चाही।
कुपोसित लईकामन बर खसरा अब्बड़ खतरनाक हो सकत हे, एखरे सेती ओमन ल खसरा के टीका लगवाना चाही, बिसेस रूप ले कुपोसन जादा हे त।