कोनो दुरबलता ले मानसिक समसिया कइसे पइदा हो सकत हे?

From Audiopedia - Accessible Learning for All
Jump to: navigation, search

कईठन जातसमाज म दुरबलता अउ दिव्यांगता के बारे म गलत धारना फइले रहिथे। लोगन के मन म ए मन ल ले के डर अउ गलतफहमी रहिथे। एखऱ कारन, दिव्यांग मनखे मन ल तियाग दिए जथे, समाज ले बाहिर कर देथे अउ उंखर संग खराब बेवहार करे जथे।


अगर तुंहर भीतर कोनो दुरबलता हे, त तुमन लाज, डर या फेर निरासा के भाउना के अनुभव कर सकत हव। तुंहर भीतर सरीर के खराब होए के, या फेर इलाजपानी के डर हो सकत हे। साथे-साथ तुमन ल अपन भविस के डर, सिछा या फेर काम-बुता के डर, या फेर समाज ले निकाले के डर, पइदा हो सकत हे। कोनो नोनी या फेर महिला के रुप म ए डर अउ जादा हो सकत हे। कारन के माईलोगन ल ओतका सिछा नइ मिल पाए जतका आदमीजात मन ल मिलथे। तुमन ल ए बात के घलो डर हो सकत हे, कहुं मोला नउकरी ले झन निकाल दे, परिवार ले अलग-बिलग झन कर दे, समाज ले झन निकाल दे या फेर मैं हा गरीब झन हो जावं।

हो सकत हे के तुमन हा पहिली ले ही समाजिक तियाग, बहिस्कार के अनुभव करे होहु या फेर कोनो मनखे ह तुंहर संग निरदय असन बेवहार करे होही।


अइसन स्थिति, तुंहर भीतर अउसाद, भारी संसो या फेर आत्मघाती बिचार पइदा कर सकत हे। अगर तुमन एखर ले परभावित हव, घबराहु झन। अइसन स्थिति के ए मतलब नइ होवए के तुमन पगला गे हव। अइसन सबो अनुभव करइया, तुहिच मन नइ हव, दुनिया म अब्बड़ झन के संग अइसन होथे। अउ अइसन कईठन तरीका हे, जेखर ले तुमन ल सहायता मिल सकत हे। तुमन कोनो स्वयं-सहायता समूह म घलोक सामिल हो सकत हव, जिहां तुमन अपन भाउना के बारे म दूसर संग बात कर सकत हव। तुमन अपन अधिकार ल जान समझ सकत हव। इहां तुमन अपन बारे म फइसला ले बर सीख सकत हव अउ अपन जिनगी म नियंतरन रखे बर घलोक सीख सकत हव।


साथे-साथ व्यक्तिगत सहायता ले के विकल्प घलोक होथे। तुंहर सारीरिक अउ मानसिक स्वास्थ्य बर जरुरी हे के कोनो मनोबिगियान संबंधी डाक्टर संग सहायता मांगव। एखर बारे म नीचे बताए गे अध्याय म जानकारी दिए गे हे, एला बिस्तार ले पढ़व। साथ म कोनो स्वास्थ्य कार्यकर्ता या फेर मनोबिगियान संबंधी डाक्टर संग मिलके सहायता के दूसर-दूसर तरीका के बारे म घलोक पुछव।

Sources
  • Audiopedia ID: hne_55_17