गर्भपात के बाद मोला परिवार नियोजन के कोन किसम के तरीका ल अपनाना चाही?
गर्भपात के दु हप्ता बाद तुमन दुबारा गर्भवती हो सकत हव। परिवार नियोजन के कईठन तरीका होथे, लेकिन सबो तरीका ल काम शुरू करे म कुछु-न-कुछु बेरा लगथे, एखरे सेती परिवार नियोजन के बारे म काखरो संग गोठियाना चाही अउ जतका जल्दी हो सके कोनो एक तरीका ल अपनाना चाही।
गोली:
तुमन गर्भपात के दिन ले ही गोली ले बर सुरू कर सकत हव। एक हप्ता ले जादा के इंतजार झन करव।
इंट्रा-यूटेराइन डिवाइस (आईयूडी):
अगर संकरमन के कोनो खतरा नइ हे, त कोनो भी परसिछित स्वास्थ्य कार्यकर्ता, गर्भपात के तुरते बाद आईयूडी लगा सकत हे।
इंजेक्शन:
पहिली इंजेक्सन ल गर्भपात के दिन या ओखर एक हप्ता बाद तक दे जाना चाही।
परतियारोपन:
परतियारोपन ल गर्भपात के ठीक पहिली या ओखर ठीक बाद या एक हप्ता बाद तक लगाए जा सकत हे।
महिला नसबंदी:
अगर तुंहर गर्भावस्था तीन महीना ले कम के रिहिस हे, त गर्भपात के दउरान या ओखर ठीक बाद तुंहर नसबंदी करे जा सकत हे। लेकिन एखर फइसला ल सावधानी ले लेना चाही, काबर ए हर स्थई होथे।
पुरूस नसबंदी:
पुरूस नसबंदी ल कोनो भी बेरा करे जा सकत हे अउ ए हर स्थई होथे। एखर फइसला ल सोच बिचार के करना चाही।
कंडोम:
दुबारा यौन संबंध बनाए के दउरान तुमन अउ तुंहर साथी कंडोम बउर सकत हे। ए हर एचआईवी समेत एसटीआई ले घलोक बचाथे।
सुक्रानुनासक:
दुबारा यौन संबंध बनाए के बेरा तुमन सुक्रानुनासक बउर सकत हव। अगर तुमन ल एचआईवी हे या तुंहर कईझन साथी हे त एखर परयोग झन करहू।
डायाफ्राम: अगर गर्भपात के बेरा कोनो चोट नइ लगे हे या फेर कोनो संकरमन नइ होए हे, त गर्भपात के बाद तुमन ल डायाफ्राम लगाए जा सकत हे।
पराकिरतिक बिधि (सलेस्मा अउ दिन के गिनती करई):
ये तरीका हर तब तक कोनो काम नइ करे जब तक ले तुंहर महवारी हा सामान्य नइ हो जाए।