गर्भावस्था अउ जनम के दउरान मोर आदमी हा मोर सहायता कइसे कर सकत हे?

From Audiopedia - Accessible Learning for All
Jump to: navigation, search

गर्भवस्था के दउरान, अगर तुंहर आदमी हर तुंहर परवाह करही, त तुमन ल सारीरिक अउ भाउनात्मक रुप ले अब्बड़ मदद मिलही। ओला तुंहर काम म हाथ बंटाना चाही। अगर ओहर खुदे तुंहर जतन नइ कर सके, त कोनो दूसर मनखे के मदद लेना चाही। ओ हर तुंहर खानपान के जतन अउ जचकी के पहिली जतन कर सकत हे। ओला अपन एचआईवी अउ एसटीआई के जांच अउ इलाज करवाना चाही। अगर ओला एचआईवी हे, त यौन संबंध के दउरान कंडोम बउरना चाही।


जचकी के पीरा अउ जचकी के दउरान तुंहर पति का कर सकत हे:

  • ओ हर ये पक्का करही के घर म भरपूर पानी अउ जेवन हे।


  • ओ हर जचकी म मदद करे बर कोनो मितानिन या स्वास्थ्य कार्यकर्ता ल घर म लाही। ओला आपातकालीन स्थिति बर कोनो गाड़ी-मोटर के बेवस्था घलोक करना चाही।


  • ओला दूसर लईकामन के जतन करना चाही।


अगर लईका के जनम के दउरान ओ हर तुंहर संग रहिथे, त एखर ले तुमन ल भाउनात्मक अउ सारीरिक सहायता मिल सकत हे। ओ हर तुंहर हिम्मत ल बढ़ा सकत हे। तुमन ल पिये बर पानी दे सकत हे अउ संकुचन के दउरान रेंगे या बइठे म तुंहर मदद कर सकत हे अउ तुंहर पीठ ल रगड़ सकत हे।


अपन आदमी ल बताना चाही के, कोनो महिला ल दुबारा मजगुत होए बर अउ स्वस्थ होए बर जनम के पहिली 6 हप्ता अब्बड़ जरूरी होथे। ए दउरान तुमन ल स्वस्थ जेवन अउ सुरताए के जरुवत होथे। ओ हर तुंहर कईठन काम ल कर सकत हे। जइसे, लकड़ी-पानी के बेवस्था करना, तुंहर लईकामन के जतन करना या जेवन तइयार करना। अगर ओ हर खुद ए सबो काम ल नइ कर सके, त कोनो दूसर ल अइसन करे बर कहि सकत हे।


अगर तुंहर आदमी हर तुंहर लईका के जतन करही त तुमन ल सुते के मउका मिल सकत हे। अउ ओ हर अपन नवजात लईका के तिर म रहि सकही।


ओला ए बात जानकारी होना चाही के तुंहर गरभासय म संकरमन ल रोके बर अउ खून बंद होए तक ले तुंहर संग यौन संबंध नइ बनाना हे।


आखिर म सबले जरुरी बात, ये हरे के महतारी के स्वस्थ रेहे बर अउ स्वस्थ लईका पइदा करे बर, अगला गर्भधारन म कम से कम दु बछर के अंतर रहिना चाही। परिवार नियोजन के तरीका अपना के तुंहर आदमी हा, तुंहर स्वस्थ रेहे बर अब्बड़ मदद कर सकत हे। तुमन ल ए बारे म ओखर संग गोठियाना चाही अउ परिवार नियोजन के तरीका ल तय करना चाही। दुनो झन ल मिलके ए जिम्मेवारी म धियान देना चाही।

Sources
  • Audiopedia ID: hne_06_18