दहेज संबंधी झगरा-लड़ई ले मैं कइसे निपट सकत हंव?

From Audiopedia - Accessible Learning for All
Jump to: navigation, search

कई देस म (जइसे भारत, पाकिस्तान, नेपाल अउ केन्या म) बिहाव के एवज म कोनो भी किसम के दहेज, जइसे नकदी के मांग, कानूनी रूप ले सख्त वर्जित हे। ये कानून ल तोड़इया मनखे मन ल जेल घलोक हो सकत हे।


दुरभाग ले कई परिवार ल अभी घलो दहेज संबंधी कानून के बारे म जादा जानकारी नइ हे। कईझन लोगन सोंचथें के अगर पुलिस करा सिकायत करे जाही त उंखर सामाजिक स्थिति ल नकसान होही। एखर सेती दहेज के परंपरा अभी तक ले बने हे, जबकि अइसन नइ होना चाही।


जब कोनो सास-ससुर ल अपन मरजी के मुताबिक दहेज नइ मिलए त अकसर एखर कारन लड़ई-झगरा होवत रहिथे। नवा बहु हर अगर अपन घर परियाप्त दहेज नइ लावए त बहु संग दुरबेवहार होथे अउ कई पइत त घरवाला हर अपन घरवाली ल छोड़े के धमकी तको देथे।

अगर दहेज विवाद के कारन तुंहर घरवाला के परिवार डहर ले तुंहर संग बुरा बेवहार करे जथे, त नीचे बताएगे तरीका ले तुमन अपन बचाव कर सकत हव:

1. ए बारे म जानकारी अउ सहायता मांगे बर अपन इलाका म कोनो महिला संगठन ले मिले के परयास करव।


2. अगर अइसन संभव नइ हे त कोनो अइसन मनखे संग चरचा करे के परयास करव, जेखर उपर तुमन ल भरोसा होही (उदाहरन बर कोनो स्वास्थ्य कारकरता या कोनो सामाजिक नेता) । तुमन, दहेज ले पीड़ित कोनो दूसर माईलोगन करा घलोक अपन बात ल रख सकत हव। कोनो-न-कोनो मनखे हर तुमन ल सहायता या सलाह दे सकत हे। धियान रखव तुमन अकेल्ला अइसन मनखे नइ हव, जेन अइसन समसिया ले गुजरत हे।


3. अइसन परोसी अउ रिस्तादार ले मदद मांगे के परयास करव, जेन तुंहर सहायता करे बर तइयार हो। तुंहर पछ लेवइया मन तुंहर ससुरार वाले मन ल कहि सकत हे के, उंखर अइसन बेवहार ल सहन नइ करे जा सकय।


4. अपन दाई-ददा, भाई अउ परिवार के दूसर रिस्तादार संग अपन बारे म गोठियावव, काबर के सहायता पाए के मामला म तुमन ल घलोक अपन भाई अतका अधिकार हे। तुमन ल तुंहर ससुरार वाले के दुरबेवहार अउ हिंसा ले बचाना उंखर करतब हावे, ओमन हा तुमन ल घर वापिस ला सकत हे। उंखर मदद मांगके तुमन उंखर उपर कोनो बोझा नइ बनत हव। तुंहर दाई-ददा अउ रिस्तादार मन ल तुंहर जिनगी ल बचाना चाही अउ नवा जिनगी सुरू करे बर पुरोतसाहित करना चाही। अगर ओमन तुमन ल वापस नइ लाहीं, त तुंहर स्थिति बर उहु मन ओतके दोसी माने जहीं, जतका के तुंहर ससुरार वाले मन।


5. अगर तुमन कोनो अइसन देस म रहिथव, जिहां दहेज वर्जित हे अउ कानूनी अपराध हे, त तुमन कानूनी कारवाई के बारे म घलोक बिचार कर सकत हव। हालांकि, तुमन ल पुलिस तीरन जाए के पहिली सावधानी ले सोंचना चाही, काबर के कई देस म जिहां दहेज ल रीत माने जथे, उहां कानूनी परनाली अकसर कमजोर होथे अउ तुंहर अइसन परयास हर बेकार हो सकत हे। एखर सेती अपन लड़ई ल सोंच-बिचार के करना चाही। हो सके त अइसन कोनो भी कारवाई के पहिली कोनो महिला संगठन ले संपर्क करना चाही। एखर ले तुमन ल जादा फायदा होही।

कोनो भी आदमी ल कोनो महिला के कीमत लगाए के अधिकार नइ हे। ओला, ओखर डहर ले लाए गे दहेज के आधार म ठुकराए या अपनाए के अधिकार तको नइ हे। एक मनखे के रूप म हर महिला हा सम्मान अउ गरिमा के संग बेवहार पाए के हकदार हावय।

Sources
  • Audiopedia ID: hne_29_15