दिव्यांग मन के परति गलत धारना के बीच मैं कइसे मदद कर सकत हवं?

From Audiopedia - Accessible Learning for All
Jump to: navigation, search

दिव्यांगता अउ दिव्यांगता के कारन के बारे म बने असन जाने के अलावा, समुदाय या जातसमाज म फइले गलत धारना ल खतम करइ हा तको जरुरी हे। तभे हमन समाज म फइले दिव्यांगता संबंधी सबो बाधा ल दूर कर पाबो। अउ बिन दिव्यांगता वाले मनखे मन संग दिव्यांग मनखे मन ल घलो सिछा, समाजिक जीवन, स्वास्थ्य, आर्थिक अउ समाजिक न्याय अउ अधिकार दिलाए बर सकबो।


ए तरीका ले दुरबलता वाले मनखे के मन के डर तको खतम हो सकही, जेखर कारन ओहा अपन लकछन ल लुकाथे अउ इलाज ले बचथे। ए तरीका ले दिव्यांग मनखे ल समाजिक तिरिस्कार के सामना करे ल नइ पड़ही। एखर ले परभावित मनखे के मानसिक समसिया अउ गरीबी ल तको दूर करे जा सकही।


अगर तुंहर समुदाय या जातसमाज म गलत धारना, दिव्यांग मनखे के परति तिरिस्कार के भाउना फइले हे त किरपा करके कोनो स्वास्थ्य कार्यकर्ता ले गोठबात करव। दुरबलता अउ दिव्यांगता के परकार अउ ओखर कारन के बारे म समुदाय ल सिछित करे बर लोगन मन संग जुर मिलके बइठक करइ हा घलो बने विकल्प हो सकत हे।


अगर तुमन ल परभावित मनखे के मानसिक स्वास्थ्य ल लेके कोनो परकार के संदेह हे, त तुमन ओखर सहयोग करे के परयास कर सकत हव। ओला अइसन मउका दे सकत हव के ओ हर अपन भाउना, बिचार या अनुभव ल तुंहर आगु खुल के रख सकय। तुमन ओला बता सकत हव के मनोबिगियान संबंधी सहायता हासिल करे के कईठन तरीका हे, जइसे कोनो स्वयं सहायता समूह म सामिल होना। इहां, कोनो महिला या पुरुस अपन भाउना के बारे म दूसर संग गोठबात कर सकत हे, दूसर ले सहायता ले सकत हे, अपन अधिकार के बारे म जानकारी हासिल कर सकत हे। ओ हर अपन जिनगी के फइसला ले बर सीख सकत हे अउ जिनगी ल सम्भाल सकत हे। साथे-साथ काखरो करा ले व्यक्तिगत सहायता घलोक लिए जा सकत हे। अइसन स्थिति म किरपा करके स्वास्थ्य कार्यकर्ता संग गोठबात करव अउ उपलब्ध विकल्प मन के बारे म जानकारी लेवव।


अगर तुमन ल संदेह हे के परभावित मनखे विसेस या गंभीर समसिया ले गुजरत हे जइसे के आत्महत्या करे के खियाल, त सीधा स्वास्थ्य कार्यकर्ता संग गोठबात करव। ओ स्वास्थ्य कार्यकर्ता हा तुमन ल कोनो विसेसगिया डाक्टर के बारे म जानकारी दे सकत हे अउ जतन के तरीका सीखा सकत हे।


अगर परभावित मनखे अपन सहमति दे थे, त तुमन सरीर के जतन या दूसर काम म ओखर सहायता कर सकत हव। सरीर के जतन कइसे करे ल हे, वाले अध्याय म ए बारे म बिस्तार ले बताए गे हे। अइसन म परभावित मनखे संग अपन स्वास्थ्य म सुधार लाए के मउका बनही! कई झन मरीज बर स्व-देखभाल समूह म सामिल होवइ हा तको एकठन बढ़िया विकल्प होथे। इहां ओ हर दूसर मनखे मन संग मिलके अपन सरीर के जतन के बारे म परसिकछन ले सकत हे।


नियमित अउ परभावी जतन के बारे म ओमन एक दूसर ल पुरूतसाहित कर सकत हें अउ सलाह दे सकत हें। साथे-साथ ओला मानसिक अउ आर्थिक मामला म घलो सहयोग मिल सकत हे। किरपा करके, कोनो स्वास्थ्य कार्यकर्ता ले एखर बारे म बात करव अउ सहायता हासिल करे के दूसर विकल्प के बारे म पता लगावव।


कभु-कभु, परिवार के सदस के रुप म तंहु ल घलो समाजिक तिरिस्कार के सामना करे बर पड़ सकत हे। कोनो दिव्यांग मनखे के जतन करइ, तुंहर बर घलोक तनाव वाले हो सकत हे। अगर तुमन ल सहायता के जरुवत हे त, कोनो स्वास्थ्य कार्यकर्ता ले गोठबात करव। दिव्यांग मनखे के परिवार के सदस मन बर घलोक स्वयं-सहायता समूह हो सकत हे, जिहां तुमन अपन भाउना के बारे म बात कर सकत हव अउ दूसर करा ले सहयोग मांग सकत हव जेन हा अइसनेच परिस्थिति ले गुजरे हे।


इहां, तुमन अपन अधिकार अउ दिव्यांग मनखे मन के अधिकार अउ ओखर उपयोग कइसे करे जाए के बारे म जान सकत हव। साथे-साथ व्यक्तिगत सहायता के घलोक विकल्प हो सकत हे। किरपा करके, ए बारे म स्वास्थ्य कार्यकर्ता ले गोठबात करव अउ उपलब्ध विकल्प के बारे म पूछव।

Sources
  • Audiopedia ID: hne_55_9