दुरबलता काला कहिथें?

From Audiopedia - Accessible Learning for All
Jump to: navigation, search

लगभग हर मनखे ल अपन जिनगी म कोनो न कोनो परकार के दुरबलता के अनुभव होथे। एखर ले सरीर के सारीरिक या मनोबिगियान संबंधी काम-बुता म फरक पड़े बर लगथे। हो सकत हे तुमन ल थोरकुन बेरा बर दुरबलता के अनुभव रहे हो, जइसे कोनो दुरघटना के कारन। लेकिन कई पइत लंबा बखत ले घलो दुरबलता हो सकत हे।


तुमन ल कोनो एक परकार के दुरबलता हो सकत हे या फेर कईठन दुरबलता हो सकत हे। अइसन दुरबलता कई कारन ले होथे, जइसे कोनो चोंट लगे के कारन या फेर दुरघटना अउ बीमारी के कारन या फेर जनम के पहिली या ओखर दउरान। कोनो मनखे म अगर कोनो परकार के दिव्यांगता हे, जइसे ओला कुछु सुनाई नइ दे, त एखर ये मतलब नइ हे ओला कुछ काम-बुता करे बर रोके जाना चाही। हो सकत हे, ओ मनखे बने असन सुन नइ सकत होही फेर हो सकत हे ओहा अब्बड़ बुद्धिमान होही। काबर के बहिरा होए ले काखरो मानसिक ताकत परभावित नइ होवए।


हो सकत हे कोनो मनखे ल देखे बर तकलीफ होत होही। हो सकत हे के ओला कम दिखत होही। अइसन म ओखर काम-बुता करे के ताकत कम हो सकत हे फेर पूरा खतम नइ होवए। कई परकार के दुरबलता ल समझे बर, हमन इंखर बीच भेद कर सकत हन:

कईठन सारीरिक दुरबलता होथे, जेन हा कोनो मनखे के सरीर के गति ल या फेर ओखर बनावट ल परभावित करथे। उदाहरन बर, जइसे कोनो मनखे के गोड़ म कोनो परकार के बिकरिति होवइ।


कईठन दुरबलता संवेदी परकार के होथे। जेन हा देखे के, सुने के, बोले के, सुंघे के, सुवाद ले के, महसूस करे या फेर संतुलन संबंधी ताकत ल परभावित कर सकत हे। उदाहरन बर, जब कोनो मनखे ल देखे म परसानी होथे।


कईठन दुरबलता दिमागी होथे, जेन बौद्धिक ताकत अउ बेवहार ल परभावित करथे। उदाहरन बर, जब कोनो मनखे ल कोनो जिनिस ल सुरता करे म परसानी होथे।


कईठन दुरबलता मनो-सामाजिक संबंधी होथे। जेन हा सोचे-समझे के, दूसर संग अपन संबंध के, बिपदा के बेरा म ओखऱ ले निपटे के, या फेर मन म बदलाव के असन ताकत ल परभावित करथे। उदाहरन बर, जब कोनो मनखे अउसाद ले ग्रसित हो जथे।


अउ कई परकार के दुरबलता होथे, जेन एके बेरा म कईठन काम ल परभावित करथे। उदाहरन बर, जब कोनो मनखे ल डाउन सिंड्रोम हो जथे। अइसन म परभावित मनखे ले एके बेरा म सीखे अउ देखे म परसानी हो सकत हे।

Sources
  • Audiopedia ID: hne_55_1