दुरबलता के का-का कारन होथे?
जइसे के पिछला अध्याय म बताए गे हे, दुरबलता कई परकार के होथे। इहां तक के, कईठन के तो कारन ल पता नइ लगाए जा सके हे।
कईठन अइसन कारन हे जेखर सेती ले दुरबलता होथे। ए समझना अब्बड़ जरुरी हे के हर दुरबलता अपन आप म एक परकार के रोग हे, जेखर कुछु कारन अउ लकछन होथे। लेकिन हर कारन, हर दुरबलता ले नइ जुड़े रहे, एखर उल्टा हर दुरबलता कोनो एक परकार के कारन ले नइ होवए।
कई परकार के बीमारी के कारन कईठन दुरबलता हो सकत हे। उदाहरन बर, कई रोगानु, संकरमन के कारन दिमाग ल परभावित कर सकत हे अउ एखर कारन दउरा पड़ सकत हे। लेकिन दउरा के कुछ दूसर कारन तको हो सकत हे। रोगानु, सरीर के दूसर हिस्सा ल तको परभावित कर सकत हे अउ आगु के जीवन बर दुरबलता के कारन बन सकत हे।
कईठन दुरबलता, कोनो चोंट के कारन घलो हो सकत हे। उदाहरन बर, कोनो दुरघटना के बाद म।
सामान्य रुप ले, जिनगीभर के दुरबलता ले बचे बर स्वास्थ्य के जतन, साफ पानी, स्वच्छता, बीमारी ल रोके के गियान अउ नियमित जतन के अभियास तको अब्बड़ जरुरी होथे।
स्वस्थ अउ आनी-बानी के जेवन तुंहर सरीर के सुरछा ल मजबूत कर सकत हे अउ तुमन ल संकरमन ले बचा सकत हे। जबकि, जरुरी पोसन के कमी जवान अउ लइकामन म कई परकार के दुरबलता के कारन बन सकत हे। गर्भावस्था के दउरान महतारी ल अगर पोसन के कमी हे त ओखर लइका हा तको दुरबल हो सकत हे। ए दउरान नसीला दवई, बीड़ी-सिगरेट या दारू पिये ले लइका ल भारी नकसान हो सकत हे।
फेर कई दुरबलता हा गर्भावस्था के पहिली अउ ओखर दउरान महतारी डहर ले करे गे कोनो काम अउ लइका के दुरबलता म हमेसा संबंध होना जरुरी नइ हे। एखरे सेती, ए बात सच नइ हे के कोनो दुरबलता के पाछु महतारी अउ लइका के घलो गलती होथे!
लइका ल जनम के पहिली तको कोनो दुरबलता हो सकत हे। उदाहरन बर, जब कोनो लइका हा जनम ले के बेरा बने असन सांस नइ ले सके, तभो ओला फरक पड़थे। जब लइका छोटे रहिथे, या फेर जवान होत जथे तभो दुरबलता हो सकत हे।
अगर दवई-गोली के उपयोग बने असन नइ करे गे हे त ओखर कारन घलो दुरबलता हो सकत हे।
जहरीला गैस, रसायन, कीटनासक या साकनासक के कारन घलो दुरबलता पइदा हो सकत हे। एला परयावरन संबंधी दुरबलता कहिथें।
ए सबो बात ले तुमन समझ सकथव के अलग-अलग परकार के दुरबलता के पाछु कईठन कारन होथे। अइसन म इंखर ले बचाव के उपाय डहर धियान देना अब्बड़ जरुरी हे। \"वॉस\" अध्याय म ए बारे म बिस्तार ले बताए गे हे। अगर तुंहर साधन हे त तुमन ल स्वस्थ अउ अलग-अलग परकार के जेवन लेना चाही। जइसे साग-भाजी, अलग-अलग फर। विसेस रुप ले गर्भावस्था के दउरान एखर ले तुंहर लइका ल जरुरी पोसन मिलथे, जेखर सेती तुंहर लइका के सही विकास म मदद मिलथे। पोसक आहार तुंहर सरीर ल सुरछा दिही। गर्भावस्था के दउरान बीड़ी-सिगरेट अउ दारू नइ पीना चाही अउ कोनो दवई खाए के पहिली अपन स्वास्थ्य कार्यकर्ता ले पूछना चाही।
वइसे कई परकार के दुरबलता अइसन होथे, जेखर कारन अभी तक अज्ञात हे या फेर जेखर कारन कुछु दूसर हे। कोनो मनखे, महतारी या परिवार के एमा कोनो हाथ नइ रहे। अइसन दुरबलता ल ठीक नइ करे जा सके। ए दुरबलता हा परभावित मनखे या कोनो दूसर मनखे के गलती ले नइ होवए। एहु बात सच नइ हे के कोनो दुरबलता या दिव्यांगता के पीछे भगवान के सराप या फेर टोना-टोटका होथे। अइसन म दिव्यांग मनखेमन संग बुरा बेवहार नइ करे ल चाही। ओला घलो सिछा, सामाजिक जिनगी, स्वास्थ्य, आर्थिक अउ सामाजिक न्याय के समान अधिकार अउ अउसर मिलना चाही।