पेल्विक जांच कइसे होथे?

From Audiopedia - Accessible Learning for All
Jump to: navigation, search

ए जांच म कोनो स्वास्थ्य कार्यकर्ता हर तुंहर बाहरी जननांग ल देखही, के ओखर भीतरी म कोनो परकार के सूजन, उभार, घाव या रंग म बदलाव त नइ होए हे।


एमा, स्वास्थ्य कार्यकर्ता हर तुंहर योनि म एकठन स्पेक्युलम डालही। स्पेक्युलम, एकठन छोटकन धातु या फेर प्लास्टिक के उपकरन होथे, जेन हर योनि के भीतरी हिस्सा ल खोल के रखथे। ए उपकरन हर सूजन, उभार, घाव या रक्तस्राव बर योनि अउ गरभासय ग्रीवा के दीवाल के जांच करथे। हो सकत हे के स्पेक्युलम के कारन तुमन ल योनि भीतर थोड़कन दबाव या फेर असुविधा महसूस हो सकत हे, लेकिन एखर ले कोनो परकार के पीरा नइ होवय। अगर तुंहर मांसपेसी सिथिल हे अउ मूत्रासय खाली हे, त ए परीछन हा जादा आरामदायक होथे।


अगर स्वास्थ्य कार्यकर्ता के क्लिनिक म परयोगसाला घलोक हे, त जरूवत पड़े म स्वास्थ्य कार्यकर्ता हर एसटीआई के घलोक जांच कर सकत हे। ओ हर केंसर के जांच करे बर, गरभासय ग्रीवा के तीर म कोनो बदलाव ल देखे बर एकठन परीछन कर सकत हे। एला पैप परीछन घलोक कहिथें। एमा गरभासय ग्रीवा के भीतरी हिस्सा ल, एचपीवी या फेर कोनो परकार के वायरस के जांच करे जथे। अइसन परीछन म पीरा नइ होवए अउ स्पेक्युलम ल सही जगह म रख के करे जाथे। अगर केंसर के जल्दी पता लगाए जाए अउ बने असन इलाज करे जाए, त एला हमेसा बने करे जा सकत हे।


स्पेक्युलम ल हाटए के बाद, स्वास्थ्य कार्यकर्ता हर एकठन साफ प्लास्टिक के दस्ताना ल पहिनही अउ एक हाथ के दूठन अंगरी ल तुंहर योनि म डालही। ओहर अपन दूसर हाथ ले तुंहर पेट के तरी वाला हिस्सा ल दबाही। एखर जरिया ओ हर तुंहर गरभासय नली अउ अंडासय के आकार अउ जघा के जांच करही। अइसन जांच के दउरान पीराना नइ चाही। अगर पीरावत हे, त स्वास्थ्य कार्यकर्ता ल एखर बारे म बतावव। हो सकत हे भीतरी म कुछु गड़बड़ होही।


कईठन समसिया बर, स्वास्थ्य कार्यकर्ता ल मलासय परीछन करे के घलोक जरूवत पड़ सकत हे। वो हर एक अंगरी ल तुंहर मलासय म डालही अउ दूसर अंगरी ल तुंहर योनि म। एखर ले डाक्टर ल तुंहर योनि, गरभासय, नली अउ अंडासय के संभावित समसिया के बारे म जादा जानकारी मिल सकही।


Sources
  • Audiopedia ID: hne_02_4