Paano nakakaapekto ang menopos menopause sa aking katawan at kaluluwa

Isa sa mga pangunahing palatandaan ng pagtanda ay ang pagtigil ng buwanang pagdurugo o regla (menopos). Maaari itong tumigil nang bigla o maaaring tumigil ito nang dahan-dahan sa loob ng isa hanggang dalawang taon. Sa karamihan ng kababaihan, nangyayari ang pagbabagong ito sa pagitan ng edad 45 at 55.

Mga palatandaan:

• Nagbabago ang iyong buwanang regla. Maaaring basta na lang tumigil ito, o maaaring reglahin ka nang mas madalas sa loob ng ilang panahon. O maaaring tumigil ang iyong regla sa loob ng ilang buwan, at pagkatapos ay muling rereglahin.
• May mga pagkakataon na maaaring bigla kang makakaramdam ng sobrang init at pagpapawis (tinatawag din itong pagkakaroon ng ‘hot flashes’ o 'mga biglaang bugso ng mainit na pakiramdam'). Maaari kang gisingin nito sa gabi.
• Mas lumiliit at nababawasan ang pagiging basa ng iyong ari.
• Nagiging madaling magpabagu-bago ang iyong damdamin.

Nangyayari ang mga palatandaang ito kapag ang obaryo ng babae ay tumitigil na sa paggawa ng itlog, at mas kakaunting estrogen at progesterone ang nagagawa ng kanyang katawan. Magsisimulang mawala ang mga palatandaang ito kapag nakakasanayan na ng kanyang katawan ang mas kakaunting estrogen.

Ang mga nararamdaman ng isang babae tungkol sa pagtigil ng kanyang buwanang regla ay depende kung minsan sa kung paano siya naaapektuhan ng mga pagbabago sa kanyang katawan. Depende rin ito sa kung paano iniisip at pinakikitunguhan ng pamayanan ang mas nakatatandang kababaihan. Maaaring ikaginhawa niya na hindi na siya magkakaregla buwan-buwan. Nguni't maaari rin siyang malungkot dahil hindi na siya maaaring magkaanak pa.

Sources

• Burns, A. A., Niemann, S., Lovich, R., Maxwell, J., & Shapiro, K. (2014). Where women have no doctor: A health guide for women. Hesperian Foundation.
• Audiopedia ID: fil010902